တရုတ်ကန့်သတ်ချက်ကြောင့် မူဆယ်နယ်စပ်မှာ ကုန်သည်တွေ ပိတ်မိနေ

တရုတ်ကန့်သတ်ချက်ကြောင့် မူဆယ်နယ်စပ်မှာ ကုန်သည်တွေ ပိတ်မိနေပါတယ်။ တရုတ်-မြန်မာနယ်စပ် မူဆယ်နယ်စပ်ကုန်သွယ်ရေးမှာ တရားမဝင်ကုန်စည် သယ်ယူမှုတွေကို နိုဝင်ဘာလ ၁၁ ရက်နေ့ကစလို့ ပိတ်လိုက်တာကြောင့် မြန်မာဘက်ကကုန်သည်တွေ ပိတ်မိနေတယ်လို့ နယ်စပ်ကုန်သည်တွေနဲ့ မူဆယ်ဒေသခံတွေက နိုဝင်ဘာလ ၁၁ ရက်နေ့က ပြောပါတယ်။

လုပ်ငန်းသုံးမဟုတ်တဲ့ ခရီးသည်တင်ကား၊ ဆိုင်ကယ်၊ သုံးဘီး၊ လက်တွန်းလှည်း စတဲ့ ယာဥ်တွေနဲ့ တစ်နိုင်တစ်ပိုင် ကုန်စည်သယ်ယူမှုတွေမှာ တရားမဝင် လမ်းကြောင်းတွေက အသုံးပြုခွင့်ပိတ်လိုက်ပြီး တရားဝင်ခွင့်ပြုထားတဲ့ ကျယ်ဂေါင် ကုန်စည်ပို့ဆောင်ရေး လမ်းကြောင်းကနေပဲ ခွင့်ပြုတော့မယ်လို့ တရုတ်နိုင်ငံ ရွှေလီအာဏာပိုင်တွေက နိုဝင်ဘာလ ၉ ရက်နေ့က ကြေညာခဲ့တာပါ။

ဒါ့ကြောင့် တရုတ်ဘက်က ကုန်တင်ကားနဲ့ ဆိုင်ကယ်တွေကို နိုဝင်ဘာလ ၁၁ ရက်နေ့ မနက် ၆ နာရီခွဲလောက်ကစပြီး လုံးဝ ဖြတ်သန်းခွင့်မပြုတော့တာဖြစ်တယ်လို့ လုံခြုံရေးအရ အမည်မဖော်လိုတဲ့ နယ်စပ်ကုန်သည်တစ်ဦးကပြောပါတယ်။

“အခုအခြေအနေကတော့ ဒီနေ့မနက် မြန်မာချိန် ၆ နာရီခွဲလောက်ကစပြီး ဝင်ထွက်ကို တင်းကျပ်လိုက်တာပေါ့။ မြန်မာက ဆိုင်ကယ်၊ ကားသေးတွေနဲ့ ပစ္စည်းတင်တဲ့ဟာတွေကို သူတို့ လုံးဝပေးမထွက်တော့ဘူး။ ဆင်ဖြူပေါက်မှာ မတန်းခိုင်းတော့ဘူး။ ပစ္စည်းတင်ထားတဲ့ ဆိုင်ကယ်တွေလည်း ဂိုဒေါင်မှာပြန်သွားချပေါ့။ သူတို့ ထွက်ထားတဲ့စာအတိုင်းပဲ စက်ဘီး၊ ဆိုင်းကယ်၊ သုံးဘီး၊ ကားတွေ ပစ္စည်းတင်ထားရင် လုံးဝ ပေးမထွက်တော့ဘူး”

နောက်ထပ် နယ်စပ်ဂိတ်ပေါက်ဖြစ်တဲ့ မန့်ဝိန်း ဂိတ်ပေါက်ကလည်း တရုတ်ဘက်က ဖွင့်ထားပေမဲ့ မြန်မာဘက်အခြမ်းက ပိတ်ထားဆဲဖြစ်တယ်လို့ သူကပြောပါတယ်။ ဒါ့ကြောင့် တရုတ်ဘက်ကနေ အသီးအနှံနဲ့ ကုန်စိမ်း ကုန်ကူးတဲ့ ကုန်သည်တွေကလည်း ဆုံးရှုံးမှုတွေ ရှိနေပြီလို့ ဒေသခံတွေက ပြောပါတယ်။

နယ်စပ်ဂိတ်ပိတ်တာကြောင့် တရုတ်နယ်စပ်ဂိတ်ကို မှီခိုနေရတဲ့ မူဆယ်၊ နမ့်ခမ်း၊ ပန်ဆိုင်းက ဒေသခံတွေလည်း အခက်အခဲဖြစ်ကြသလို ကုန်ပစ္စည်းတွေလည်း စျေးတက်လာပြီလို့ မူဆယ်ဒေသခံတွေက ပြောပါတယ်။

ရှမ်းပြည်နယ်မြောက်ပိုင်းက ကျင်စန်းကျော့၊ ချင်းရွှေဟော်၊ ရန်လုံကျိုင်း၊ မုန်းကိုးနဲ့ နမ့်ခမ်းဂိတ်တွေကို ညီနောင်မဟာမိတ်သုံးဖွဲ့က သိမ်းပိုက်ထားပြီး ကချင်ပြည်နယ်က လွယ်ဂျယ်နယ်စပ်ဂိတ်ကို KIA က ထိန်းချုပ်ထားတာပါ။

အခုကုန်ပစ္စည်းသယ်ယူမှု ပိတ်ပင်လိုက်တဲ့ မူဆယ်နယ်စပ်ဂိတ်ကလွဲပြီး ရှမ်းပြည်နယ်မြောက်ပိုင်းနဲ့ ကချင်ပြည်နယ်မှ တိုင်းရင်းသား လက်နက်ကိုင်တပ်ဖွဲ့တွေ ထိန်းချုပ်ထားတဲ့ တရုတ်-မြန်မာ နယ်စပ်ကုန်သွယ်ရေးစခန်းတွေကို တရုတ်ဘက်က ပိတ်ထားပါတယ်။

Source from RFA BURMESE