အသက်အရွယ်အလိုက် ကျန်းမာရေးစစ်ဆေးမှုကိုခံယူပါ။
အသက်ရှည်ခြင်း၏လျှို့ဝှက်ချက်မှာ မှန်ကန်သောအစားအစာစားသုံးခြင်း၊ လုံလောက်စွာအနားယူခြင်းနှင့် လေ့ကျင့်ခန်းပုံမှန်လုပ်ခြင်းများသာမက ကျန်းမာရေးစစ်ဆေးခြင်းသည်လည်း မရှိမဖြစ်လိုအပ်ပါတယ်။ ပုံမှန်ကျန်းမာရေးစစ်ဆေးခြင်းသည် သင်၏ ကျန်းမာရေးပြဿနာများကို ကာကွယ်ရန်၊ ရုပ်ပိုင်းဆိုင်ရာကျန်းမာရေးနှင့် ကျန်းမာကြံ့ခိုင်မှုကို ထိန်းသိမ်းရန်နှင့် သင့်ခန္ဓာကိုယ်ကို မည်သည့်အသက်အရွယ်တွင်မဆို ပြန်လည်တည်ဆောက်ရန် ကူညီပေးမည်ဖြစ်ပါတယ်။ ကျန်းမာရေးစစ်ဆေးခြင်းဖြင့် ရောဂါတွေကို ဘယ်လိုကာကွယ်မလဲ။ ဘ၀နေထိုင်မှုပုံစံ အကဲဖြတ်ခြင်းအပါအဝင် ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ကျန်းမာရေးနှစ်ခုစလုံးအတွက် ပြီးပြည့်စုံသော ကျန်းမာရေးစစ်ဆေးမှုသည် သင့်ကျန်းမာရေးကို စစ်ဆေးရုံသာမက ဖျားနာခြင်းမှ ကာကွယ်ရန် စောင့်ရှောက်မှုအစီအစဉ် ရေးဆွဲရာတွင်လည်း အထောက်အကူဖြစ်စေပါတယ်။ အထူးသဖြင့် ရောဂါလက္ခဏာများမပြသောအခါတွင်၊ သင်သတိမပြုမိနိုင်သော အသံတိတ်အန္တရာယ်ကို စစ်ဆေးခြင်းဖြင့် ပုံမှန်မဟုတ်သောအန္တရာယ်များကို စစ်ဆေးတွေ့ရှိနိုင်သောကြောင့် နှစ်စဉ်ကျန်းမာရေးစစ်ဆေးခြင်းသည် အလွန်အရေးကြီးပါတယ်။ ထိုသို့စစ်ဆေးခြင်းဖြင့် အချိန်မနှောင်းမီတွင် သင့်ကျန်းမာရေးအခြေအနေများကို သိရှိနိုင်မည်ဖြစ်ပါတယ် ကျန်းမာရေးစစ်ဆေးမှုသည် ရောဂါများကို ကာကွယ်ရန် သို့မဟုတ် ကုသရာတွင်မည်သို့အထောက်အကူပြုပါသလဲ။ သင့်တွင် နာတာရှည်ရောဂါရှိနေပါက၊ နှစ်စဉ်ကျန်းမာရေးစစ်ဆေးခြင်းသည် သင့်ဆရာဝန်ထံ ပုံမှန်သွားရောက်ပြီး ၎င်းတို့၏အကြံဉာဏ်များကို လိုက်နာနိုင်ရန် ကူညီပေးမည်ဖြစ်ပါတယ်။ ရောဂါဖြစ်ပွားမှုမှ ပြင်းထန်မှုကို လျှော့ချနိုင်ပြီး ပျောက်ကင်းနိုင်ခြေကို တိုးမြင့်စေကာ နောက်ဆက်တွဲပြဿနာများကိုလျော့ပါးစေသောကြောင့် အထူးသဖြင့် ဆေးလိပ်သောက်ခြင်း၊ အရက်သောက်ခြင်း၊ အဆီများသောအစားအစာများစားသုံးခြင်း၊ ကိုယ်လက်လှုပ်ရှားမှုမရှိခြင်းနှင့် စိတ်ဖိစီးမှုများခြင်းကဲ့သို့သော အန္တရာယ်ရှိသော ဘဝနေထိုင်မှုပုံစံရှိသူများတွင် အနီးကပ်စောင့်ကြည့်စစ်ဆေးမှုကိုပြုလုပ်သင့်ပါတယ်။ ကျန်းမာရေးစစ်ဆေးခြင်းဖြင့် သင့်ခန္ဓာကိုယ်ကျန်းမာကြံ့ခိုင်မှုကိုပြန်လည်တည်ဆောက်ပါ။ နာမကျန်းမှုမှ ပြန်လည်ကောင်းမွန်လာသော လူနာများအတွက်၊ ပုံမှန်ကျန်းမာရေးစစ်ဆေးမှုများသည် ခန္ဓာကိုယ်ကျန်းမာကြံ့ခိုင်မှုပြန်လည်ရရှိရန် ရေရှည်စောင့်ရှောက်မှုအစီအစဉ်တွင် ကူညီပေးပါတယ်။ ကင်ဆာ သို့မဟုတ် နှလုံးလူနာများကဲ့သို့ အချို့သောလူများအတွက် အပြည့်အဝပြန်လည်ကောင်းမွန်လာစေရန် တိကျသေချာသော ကျန်းမာရေးစစ်ဆေးမှုကို သမားတော်များမှ အကြံပြုနိုင်ပါတယ်။ ကျန်းမာရေးစစ်ဆေးမှုများသည် သင့်ခန္ဓာကိုယ်၏ကျန်းမာရေးအခြေအနေကိုသိရှိစေနိုင်ပြီး လူနာတစ်ဦးချင်းစီ၏ လိုအပ်ချက်များနှင့်အညီ နေထိုင်မှုပုံစံပြောင်းလဲခြင်းကို ဆရာဝန်များက အကြံပြုနိုင်ပါတယ်။ နှစ်စဥ် ကျန်းမာရေးစစ်ဆေးခြင်း ကျန်းမာရေးစစ်ဆေးခြင်းမပြုလုပ်မီ ဘဝ၏ အသက်အရွယ်အမျိုးမျိုးကို ဖြတ်သန်းစဉ်တွင် ဖြစ်နိုင်ခြေရှိသော အန္တရာယ်များကို စစ်ဆေးရန် ဆရာ၀န်များမှ တိကျသေချာစွာအကြံပြုထားသော ကျန်းမာရေးစစ်ဆေးမှုများ ရှိပါတယ်။ ဤစစ်ဆေးမှုများသည် အန္တရာယ်ရှိသော အခြေအနေများတွင်သင့်လျော်သော စောင့်ရှောက်မှုအစီအစဉ်ကို အကောင်အထည်ဖော်နိုင်ရန်အတွက် ပြဿနာတစ်စုံတစ်ရာကို စောစီးစွာသိရှိနိုင်စေရန် ကူညီပေးပါတယ်။ နှစ်စဉ်ကျန်းမာရေးစစ်ဆေးမှုသည် အဓိကကျသော အခန်းကဏ္ဍမှ ပါဝင်သောကြောင့် မပျက်ကွက်ရန် အရေးကြီးပါတယ်။ ကျန်းမာရေးစစ်ဆေးခြင်း ဘ၀နေထိုင်မှုပုံစံနှင့် ကိုက်ညီသော ကျန်းမာရေးစစ်ဆေးမှုများကို ရွေးချယ်စစ်ဆေးသင့်ပါတယ်။ ဥပမာအားဖြင့်၊ အဝလွန်ခြင်းရှိပါက ပုံမှန်စစ်ဆေးမှုနှင့်အတူ သွေးချို၊ ဆီးချို နှင့် ကင်ဆာရောဂါရှိမရှိကိုလည်း စစ်ဆေးသင့်ပါတယ်။ အကယ်၍ သင်သည် အရက်ကို ပုံမှန်သောက်ပါက ပုံမှန်စစ်ဆေးမှုများအပြင် အသည်း၏လုပ်ဆောင်ချက်ကို စစ်ဆေးမှုများ ပြုလုပ်သင့်ပါတယ်။ ကျန်းမာရေးစစ်ဆေးခြင်းပြုလုပ်ပြီးနောက် ကျန်းမာရေးစစ်ဆေးမှုပြုလုပ်ပြီးနောက် သင့်ဆရာဝန်သည် သင့်အား ပိုမိုကျန်းမာလာစေရန် ဘ၀နေထိုင်မှုပုံစံကို ပြောင်းလဲရန် အကြံပြုနိုင်ပါတယ်။ အစားအသောက်ပုံစံ ပြောင်းလဲခြင်း သို့မဟုတ် လေ့ကျင့်ခန်း ပိုလုပ်ခြင်းကဲ့သို့ ပြုပြင်ပြောင်းလဲမှုများ ပြုလုပ်ရန် လိုအပ်နိုင်ပါတယ်။ နောက်ဆက်တွဲချိန်းဆိုမှုများသည် သင်၏တိုးတက်မှုကိုအကဲဖြတ် စစ်ဆေးရန်နှင့် ပြင်းထန်သောကျန်းမာရေးပြဿနာများကို ကာကွယ်ရန် အရေးကြီးပါတယ်။ ဥပမာအားဖြင့် သင့်တွင် ကိုလက်စထရောများနေပါက ဆရာဝန်သည် အစားအသောက်ပြောင်းလဲမှုနှင့် လေ့ကျင့်ခန်းများကို အကြံပြုမည်ဖြစ်ပြီး သင်မည်ကဲ့သို့လုပ်ဆောင်နေသည် ကိုသိရှိရန် နောက်ထပ်စစ်ဆေးမှုများပြုလုပ်ရန် လိုအပ်မည်ဖြစ်ပါတယ်။ ကျန်းမာရေးစစ်ဆေးမှုအတွက် ဘယ်လိုပြင်ဆင်ရမလဲ အိပ်ရေးပျက်လျှင် ရလဒ်အဖြေများကို ထိခိုက်စေနိုင်သောကြောင့် အိပ်ချိန် အနည်းဆုံး ၆ နာရီ လုံလောက်စွာ အနားယူပါ ကျန်းမာရေးစစ်ဆေးမှုမပြုလုပ်မီ အနည်းဆုံး ၈-၁၀ နာရီအလိုတွင် မည်သည့်အစားအစာ သို့မဟုတ် အရည်ကိုမဆို စားသောက်ခြင်းမှ ရှောင်ကြဉ်ပါ။ ရေအနည်းငယ်သောက်ခြင်းကို ခွင့်ပြုပါသည်။ ဆေးမစစ်မီ အနည်းဆုံး ၂၄ နာရီအတွင်း အရက်သောက်ခြင်းမှ ရှောင်ကြဉ်ပါ။ သွေးဖောက်စစ်ဆေးရန်အတွက် သင့်တော်သော အဝတ်အစားများကို ၀တ်ဆင်ပါ။ အမျိုးသမီးများအနေဖြင့် ရာသီစက်ဝန်းအတွင်း နှင့် ရာသီစက်ဝန်းမတိုင်မီ သို့မဟုတ် 7 ရက်အကြာတွင် ဆီးစစ်ဆေးခြင်းမပြုလုပ်သင့်ပါ ရာသီစက်ဝန်းအတွင်းရှိအမျိုးသမီးများသည် ရင်သားတင်းရင်းနေနိုင်သောကြောင့် ရင်သားကင်ဆာစစ်ဆေးရန်အတွက် ရင်သားဓာတ်မှန်ရိုက်စစ်ဆေးခြင်းကို မပြုလုပ်သင့်ပါ။ အသက်အရွယ်အလိုက် ကျန်းမာရေးစစ်ဆေးခြင်း။ မွေးကင်းစမှ စတင်၍ အသက်အရွယ်ကြီးလာသည်နှင့်အမျှ လူတိုင်းအတွက် ပိုမိုတိကျသော ကျန်းမာရေးစစ်ဆေးမှုများသည် အရေးကြီးပါတယ်။ အသက်အရွယ်ရလာသည်နှင့်အမျှ အချို့သောကျန်းမာရေးပြဿနာများ၏အန္တရာယ်များ တိုးလာနိုင်သောကြောင့် စမ်းသပ်စစ်ဆေးမှုများပိုမိုလိုအပ်လာပါတယ်။ ဥပမာအားဖြင့် အသက် ၃၀ နှစ်အထက် အမျိုးသမီးများတွင် သားအိမ်ခေါင်းကင်ဆာ စစ်ဆေးခြင်း ပြုလုပ်သင့်ပါတယ်။ အသက် ၄၀ ကျော် အမျိုးသမီးများသည် ရင်သားကင်ဆာစစ်ဆေးမှုခံယူသင့်ပါတယ်။ အသက် ၅၀ ကျော် အမျိုးသားများသည် ဆီးကျိတ်ကင်ဆာကို စစ်ဆေးသင့်ပါတယ်။ အသက် ၄၀ ကျော် အမျိုးသားရော အမျိုးသမီးပါ ဝမ်းဗိုက်အတွင်းပိုင်းကို စစ်ဆေးဖို့ ဝမ်းဗိုက် အာထရာဆောင်း ရိုက်သင့်ပါတယ်။ မီးယပ်သွေးဆုံးသော အမျိုးသမီးများသည် အရိုးသိပ်သည်းဆကို စစ်ဆေးသင့်ပါတယ်။ ဤစစ်ဆေးမှုများသည် ပြဿနာများကို စောစီးစွာသိရှိနိုင်ရန် ကူညီပေးပြီး သင့်အား ကျန်းမာကြံ့ခိုင်သောဘ၀ကိုရရှိစေပါတယ်။ ထို့အပြင် နောင်တွင်ဖြစ်လာနိုင်သည့် ကျန်းမာရေးပြဿနာများကို ရှောင်ရှားနိုင်ရန် သင့်ဘ၀နေထိုင်မှုပုံစံပေါ်မူတည်၍ ကျန်းမာရေးစစ်ဆေးမှုများ ပြုလုပ်သင့်ပါတယ်။ ဥပမာအားဖြင့် အဆီများသော အစားအစာ စားသုံးမှုများလျှင် သွေးတွင်း ကိုလက်စထရော ပမာဏကို ပုံမှန်စစ်ဆေးပါ။ လူကြီးများအနေဖြင့် အသက်အရွယ်နှင့်ဆိုင်သော အခြေအနေများကို ကြုံတွေ့ရတတ်သောကြောင့် ပုံမှန် မိမိကိုယ်ကို စစ်ဆေးမှုများ ပြုလုပ်သင့်ပါတယ်။ ပုံမှန်မဟုတ်သောတစ်ခုခုကို သတိထားမိလျှင် ဆရာဝန်နှင့် ချက်ချင်းပြသပါ။ ကျန်းမာရေးစစ်ဆေးခြင်း အထူးကု Dr. Chairat Sriphirom, Family Medicine Specialist, Health Design Center, Bangkok Hospital Source From : Bangkok Hospital